在大世界看棋赛

◆ 钱云森

60多年前，我还勒读中学，课余喜欢看人对弈象棋，尤其是残局，我会拿双方个走法侪记勒脑子里，等有了空闲，就自己勒棋盘浪“左右互搏”一番，自得其乐。有一年暑假，有一天，我去离家勿远个大世界看电影。走过环形走廊，辣一扇橱窗里看到一张象棋残局图，并且写明此局红先获胜，有兴趣个观众可以拿残局解法写勒纸头浪，投到旁边个信箱里，就有机会获得奖品。我马上拿迭个残局记勒脑子里。随后看电影个辰光，脑子里一直辣思考残局个解法，经过反复试练，红棋、黑棋较量12个回合，终于有了确定答案。解法有了，哪能写出来呢？假使拿每一步走法侪画成棋盘，就要画廿几幅图，太麻烦了。

看过电影，勒大世界吃了点小吃当夜饭，我又走到5层屋顶花园，因为听说有著名棋手辣搿搭进行象棋友谊赛。我从来呒没看过正规棋赛，所以想要开开眼界。

搿辰光屋顶花园已经搭起一个半人多高个平台，上面竖起两面大棋盘。台前有一排排靠背长椅，已经聚集了四五百观众，我勒后排寻了一个位子坐下来。看到大棋盘搭仔大棋子，我心里奇怪，就问旁边一个胖墩墩个老伯伯，棋子棋盘介大，棋手呒没介长个手，哪能走棋呢？

老伯伯听了哈哈笑，问我是勿是第一趟看棋赛。我点头说是。老伯伯就讲，等一歇棋手是勒旁边一张方桌浪向走棋，每走一步，就会有人报出走法，工作人员会用长竿扠起大棋盘浪个棋子，移动指定位置，台下观众就可以看得清清爽爽。

搿个辰光，观众席浪突然响起热烈掌声，两个参加比赛个棋手上场了，一个是中年人，一个年纪比我小点，头颈浪还系着红领巾呢。老伯伯低声跟我讲：“人不可貌相，台上搿个小阿弟还勒学堂读书，棋走得斜气好，天赋极高，赢过好几个有名棋手，我对伊特别佩服，搿趟特意从浦东赶来看伊比赛。”

老伯伯一边讲，一边从拎包里拿出一本练习簿，撕下两张纸递给我，还有一截铅笔头，叮嘱我勒比赛辰光，拿伊拉两家头棋子个走法记下来，带回去研究，对提高棋艺有好处嗰。

我惊讶地问：“搿哪能记啦？”老伯伯交关热情，讲伊来教我。伊讲：“只要仔细听工作人员个播报，看清大棋盘浪棋子移动个位置，迅速认真记录下来，慢慢交就熟练了，勿难嗰。”

果然，台上棋手较量了几个回合，老伯伯就夸我记得呒没错。有时棋手走了一个妙着，观众掌声雷动，声声喝彩，老伯伯也拍手叫好，碰到棋手举棋不定，皱眉沉思，老伯伯就趁机分析棋局，讲得头头是道，我听得津津有味，收获勿少，十分开心。

比赛结束，顶让我高兴个是，我已经学会了记录棋谱个方法，当场心热手痒，拿之前橱窗里看到个残局，搭仔我反复思考个解法一步步记录下来。最后，还写了自家个姓名与地址，激动又忐忑地投进了那个信箱。半个月后，邮递员给我送来了奖品，是一册《象棋》月刊杂志。

海量资讯、精准解读，尽在新浪财经APP