《古臣周记－古臣》新股「烟不离酒」，百威亚太抽唔抽得过？

原标题：《古臣周记－古臣》新股「烟不离酒」，百威亚太抽唔抽得过？ 来源：经济通

　　《古臣周记》贴市嘅缸友应该感受到最近鱼缸嘅焦点，几乎每日十大成交量入边都有几只系半新股，而且部分成绩都几省镜，几乎合埋双眼求其买一只，set好止赚位都有一千几百银执，搅到阿臣都心郁郁想买返几手。其中最令阿臣心郁嘅自然系中烟香港（06055），由上市价4﹒88银，几日间最高炒到28﹒5银，急飙4﹒8倍，如果IPO後手持一手就劲赚成23620银，打破上年毛记（01716）最多赚21121银嘅神话。作为香江唯一一只烟草佬，讲话题的确够晒「煞食」，不过睇返中烟嘅招股书，其实盘数就唔太好睇，上年盈利仲有倒退嘅迹象，少赚两成半到2﹒6亿；营业额70亿银跌一成。如果买咗嘅缸友系谂住坐货到公布中期业绩，咁就要「谂过度过」。

*中烟香港大幅炒高，「饮酒」难期望？*

　　除咗「食烟」，「饮酒」都系缸友另一个会谈论嘅话题，讲紧嘅系下个星期五（19日）挂牌、听日（11日）中午截止认购嘅百威亚太（01876）。呢只大鱼系由全球最大啤酒生产商百威英博（AB　InBev）分拆出嚟嘅亚太区业务，将会系香江历来第五大新股。不过，缸友可能会对今次百威亚太上市集资用嚟还债而有微言，不过君不见当年AIA（01299）上市都系为阿妈还债，但今日成绩如何有目共睹啦！睇埋盘数佢，百威亚太上年盈利同收入都有增长，分别为约三成及近九巴仙，比青啤（00168）同润啤（00291）都要好；再睇埋毛利率同纯利率更加有55﹒2巴仙同16﹒7巴仙，比青啤37﹒7巴仙同5﹒3巴仙、润啤35﹒1巴仙同3﹒1巴仙为高。加上品牌方面走高端路线，估值当然会较高，市盈率实际上只系比青啤30﹒7倍略高，大约有33﹒5倍，而润啤就有37﹒1倍。
　　以大市值上市，加上港元拆息最近急升，借孖屐嘅意欲都少啲，古臣谂缸友唔好期望佢挂牌後会好似中烟咁升到癫咗，不过只要「孖屐」气氛唔太差，应该都可以有几巴仙落袋，想短线嘅缸友就set定目标，灵活走位啦！
　　至于想长揸嘅缸友，可能就要等一等啦。长远去睇，阿臣认为除非再有收购否则销量都唔会大增，三年前阿妈嗰边已经收购全球第二大啤酒厂商SABMiller　PLC（萨博米勒）而搅到债台高筑，而现时阿妈已经占全球啤酒市场三分一，再收购会买咩，阿臣都未谂到。再讲，花旗国鱼缸最近再创高峰，上个星期当地公布嘅就业数据已经令减息憧憬下降，阿臣认为侵侵（特朗普）对鲍叔（鲍威尔）嘅态度可能会系美股下个回调嘅借口。花旗国鱼缸若果要跌，香江都应该无走鸡罗，所以等跌缸友先谂长线投资啦。另外，缸友都应该记得阿里市传会喺下半年嚟香江上市，阿臣睇好阿里表现多啲，而且长线去睇入恒指嘅机会几大，如果无咩闲钱或者睇长线嘅缸友，不如留返啲弹药重鎚呢只好过啦！

*鱼缸欠缺催化剂，短期维持上落格局*
　　
　　花旗国减息憧憬降温，上个星期五出嘅非农数据大胜「孖屐」预期，之前大贪觉得可以减息半厘嘅愿望要落空啦！但系「孖屐」都仍然认为今个月可能会减四分一厘，不过如果呢个期望都落空咁，鱼缸嚟紧可能仲有一下要跌啊。鱼缸今个星期开局已经连失十天、百天、廿天同五十天线，当中十天线开始掉头，本来希望升破百天线形成黄金交叉，睇嚟要暂告一段落。恒指14天<！-- newline -->RSI现时仍然属于合理水平，或者之後中美谈判有好消息就可以弹一弹，现水平阿臣觉得鱼缸都系以上落市居多，咁嘅情况下阿臣可能试试买下星期出世嘅界内证，所以先按兵不动啊！

　　表列截至7月10日（11：00am止）投资组合表现：
　
　　股份　　　　　　股数　　　　　平均买入价　　　　　　现价　　　　　　　总值
　　----------------------------------------
　　港股：
　　金界　　　　　4000股　　　9﹒65元　　　　　9﹒92元　　　39680元
　　----------------------------------------
　　股票市值　　　　：　39680元
　　剩余现金　　　　：112581元
　　组合净值　　　　：152261元
　　组合本月收益表现：+　0﹒92%（截至上月底止组合净值：150870元）
　　组合累计收益表现：+45﹒01%（本金105000元计）（2016年8月开仓）
　
　　*数据截至今日11：00am