老伴烧个红汤交关赞|蔬菜_新浪财经

文/钱红春

我搭儿子一家相隔只有“一碗汤”个距离，平常各自开伙仓。因为伊拉工作忙，老伴常常会烧点菜送过去，烧得最多个是红汤。

上世纪七十年代，我屋里附近有家西餐馆，虽然经常路过，但从来呒没进去过。后来上幼儿园个儿子参加游泳训练，教练常常关照家长，讲每天运动量大，要注意小囡个营养。但埃歇辰光鸡蛋、豆制品、猪肉、家禽等侪要凭证凭票，想补充营养呒没介便当。有一趟我带儿子路过西餐馆门口，终于下决心带儿子走进搿家西餐馆，其中一碗红汤让伊胃口大开。后来只要有碗红汤，就算别个菜简单点，饭也会吃到打饱嗝。当时收入低，天天下馆子吃勿消，为了让儿子多吃点饭，有辰光就拿钢盅镬子单买红汤端回来吃。搿家店也蛮地道，客人自带盛器，每碗红汤要比堂吃多半勺子。

红汤里虽然大部分是蔬菜，但搿家西餐馆个红汤，汤面浪总是浮一层红油，汤里个各种蔬菜酥而勿烂，糯而勿粘，稍微一嚼就能咽下去。尤其是出锅辰光撒辣汤面浪几片薄薄个红肠，香味扑鼻，交关诱人。加上搿种汤酸甜交融，咸淡适中，汤汁粘稠，辣当时啥物事侪要计划供应个年代，看到就会馋吐水溚溚渧。埃歇辰光手头勿宽裕，搿种汤也勿是天天可以吃个。老伴个厨艺勿错，但对红汤一眼勿懂，看儿子介欢喜，就自家动手做，终因勿得要领屡屡失败，儿子尝一口就连连摇头讲“勿好吃”。

后来屋里搬到当时个郊区，买红汤就呒没介便当了。当时儿子已经读中学，每天还是要参加游泳训练。为了让儿子多吃点饭，老伴又想着自家做红汤。当时已经取消了票证，市场供应要比过去丰富，但看上去蛮简单个红汤，做出来个味道还是勿对。妻子勿罢休，一趟趟总结经验教训，勿断向人家讨教，甚至手捧烹饪书依样画葫芦，终于有点像样了。有一趟到同事屋里聚餐，伊自告奋勇烧仔一锅红汤，大家侪跷起大拇指讲“味道好极了”。老伴呒没因此满足，退休后，一有空就看书看报，发现关于红汤个介绍就收集起来，再结合自家个体会勿断摸索，终于有点长进了。

前几年，老伴买仔一只最大规格个家用不锈钢镬子，专门用来烧红汤。伊最欢喜烧牛肉红汤，牛肉要肥瘦相当，汏清爽，切成小块，淖脱血水，小火慢炖。伊对蔬菜前加工特别讲究，卷心菜要除脱叶子当中个粗梗，胡萝卜要削皮。除脱土豆要等牛肉快要炖酥个辰光再放进镬子一道烧，其余蔬菜侪要分别辣油镬子里煸炒到七分熟等用。自家做番茄酱也是蛮费功夫个环节，老伴欢喜选用新鲜番茄，去皮切成小块，放到油镬子里小火煸炒，加好糖等调料，要勿停翻炒成酱。等放到汤里个土豆烧熟了，再拿蔬菜依次放进去，最后加番茄酱，搅拌后继续烧，等到土豆粉而勿烂，一镬子色香味俱全个红汤就烧好了。

红汤个味道好勿好，最有发言权个是儿子。伊辣国外生活了交关年数，也去过勿少国家，品尝过各种各样个红汤，但是回国以后，每趟吃到伊姆妈烧个红汤，侪会讲“赞个，小辰光个味道又回来了。”