“赖孵鸡”孵小鸡|鸡_新浪财经

文/侯宝良

春天气候转暖。老早迭歇辰光是一年当中孵小鸡个最好辰光。据说三四月里养小鸡斜气有利，成活率高；到八九月份就会生蛋，而老鸡刚巧停产换毛。哈，正好一年吃蛋勿愁啊！

我小辰光正逢三年困难时期。有一年春天，乡下亲眷送来一只生蛋个老母鸡。埃歇辰光菜场买蛋要凭票，城里也允许养鸡鸭，屋里有了生蛋鸡，就养辣嗨。外公从柴爿堆里拣眼像样个木料搭了一只鸡窋，底部铺眼烧过个煤球灰，母鸡勒新窠里过起了早出晚归个日脚。

有一天，母鸡碰着邻居个公鸡就温顺趴下，那公鸡倒来了劲，压到母鸡背脊浪咬牢伊个鸡冠抖尾巴。过了一歇，公鸡拍拍翅膀、母鸡抖抖身体，立起来相安无事，各归各走开了。从此以后，我常常看见外婆从鸡窋里拿出蛋辣太阳光下照看，有一只蛋拨伊囥到米缸里，其他侪烧菜吃了。

又过了一段辰光，母鸡一改早出晚归个习惯，趴勒鸡窠里懒洋洋个勿肯出来。外公讲，鸡“塞窠”了，邻居叫“赖孵鸡”“趴窝鸡”。弟弟想赶伊出来，母鸡反抗用尖嘴啄伊个手。外婆就讲，“赖孵鸡”正好用来孵小鸡。听到会孵小鸡，我搭仔弟弟侪觉着好白相，外婆从米缸里拿出八九只囥起来个鸡蛋，均匀摆勒新换煤灰个鸡窋里，抱起赖孵鸡放到鸡蛋浪向。回头轻声告诉阿拉，勿许随便来惊动老母鸡。母鸡喂食是一天隔一天，外婆拿我小辰光个破棉裤剪了一块，抱出母鸡喂食辰光，就用破棉裤盖好鸡蛋保温。喂好以后，让母鸡排出粪便，再抱回去继续孵蛋，搿能鸡蛋就勿会弄龌龊了。

大概过了三个礼拜，有几只蛋破壳了，每只侪伸出一只小鸡脑袋……外婆拿小鸡放到一只盘子里，毛绒绒个，斜气好白相。还有呒没破壳个哪能办呢？覅急，外婆拿蛋放到温水里观察，蛋能浮起来，还会摇摆个，就是活蛋。沉到水底个，外婆就拨外公吃了补身体。

我眼前总会浮现出小辰光养个老母鸡孵小鸡个样子，斜气亲切，斜气温馨。